2 Samuël 19
01Haildaal oetstuur zunderde keunenk zok òf in n opkoamer boven poort. Hai jammerde aalwegdeur: "Absalom, mien jong, mien Absalom. Was ik mor dood in dien stee, Absalom, mien jong, mien jong!"
02Ze vertelden aan Joäb: "Begriep toch ais aan, nou zit keunenk vrachteg toerloos te reren en te jammern om Absalom!"
03Veur aal zien volk wer dij dag n dag van raauw in stee van overwinnen, dou zai heurden dat keunenk zo aldernoarste slim raauwde om zien zeun.
04Soldoaten slopen dij dag as daiven stad in, krekt as n leger dij zok schoamt dat ze der oetknepen binnen.
05Keunenk haar zien gezicht toudekt en schraifde t oet: "Absalom, Absalom, mien jong, mien jong!"
06Dou stapte Joäb op keunenk òf en zee: "Schoamachteg zo as ie joe aanstellen tegenover aal joen knechten. En dat nog wel nou ze dizze dag joen levent red hebben en dat van joen zeuns en dochters, joen vraauwlu en bievraauwen.
07Nou komt t aan t licht dat ie joen vijanden geern lieden maggen en dat ie joen vrunden hoaten. Ie loaten wel blieken dat ie joen ofsieren en manschoppen niks in reken hebben. Joa, nou wait ik dat joe t niks schelen kin dat wie altmoal dood wazzen as Absalom nog mor leefde.
08Gain gemier! Nou in t èn, en noar boeten! En spreek joen soldoaten zo tou, dat ie heur bie t haart kriegen. Want bie de HEER, ik sweer joe, as ie dat naít doun, den blift ter vannaacht gainain meer bie joe. En dat zol slimmer veur joe wezen as aal t meleur dat joe overkommen is van joen jonge joaren òf tot nou tou."
09Dou kwam keunenk in t èn en ging in poort zitten. Dou zien soldoaten heurden: "Hai is ter weer!" trokken ze aalmoal in optocht bie hom langs.
Isrelieten wazzen der vandeur goan. Elk noar zien aigen hoes.
10 Dou begunde bie ale stammen van Israël t volk te mòtjen tegen d'oldsten. Ze zeden: "Keunenk het ons verlöst van ons vijanden, benoam van Filistijnen. En nou mos hai tou t laand oet vluchten veur Absalom.
11 Mor Absalom, dij wie over ons aansteld haren, is in oorlog omkommen. Nou den, woarom hang ie der tegen om keunenk weerom te hoalen?"
12 Dou keunenk gewoarwer wat hail Israël zee, stuurde hai priesters Sadok en Abjatar dizze bosschop: "Proat ais mit oldsten van Juda en vroag heur: 'Woarom loop ie aiglieks nait veuraan om keunenk weerom te hoalen?'
13 Ie binnen mien bruiers ja, mien aigen vlaais en bloud. Kom op, nait zoezen!
14 Zeg tegen Amasa noamens mie: 'Doe bist mien aigen vlaais en bloud. Ik sweer die bie de HEER dastoe mien generoal wordst in stee van Joäb, van dit aigenste ogenblik òf.'"
15 Zo belokte hom t om haile stam van Juda te beproaten, van dij gevolgen dat ze hom bosschop stuurden: "Kom asjeblieft weerom, mit aal joen volk."
16 Zo kwam keunenk weerom. Dou e bie Jordaan kwam, wazzen lu van Juda der ook al. Dij wazzen hom in muit goan noar Gilgal tou, om hom van aanderkaant Jordaan op te hoalen.
17 Simi, zeun van Gera, oet Bachurim, was der ook rad bie om keunenk David in muit te goan, tougelieks mit lu van Juda.
18 Bie hom wazzen doezend man van Benjamin, en ook Siba, rentmeester van Saul, mit zien vieftien zeuns en twinneg knechten. Liek tegenover David runden ze noar Jordaan
19 en radjes der overhèn om keunenk en zien femilie noar overkaant te helpen en van dainst te wezen. Krekt dou keunenk Jordaan oversteken zol, vuil Simi veur hom op knijen en zee:
20 "Och, mien heer en keunenk, neem mie toch nait kwoalek wat ik misdoan heb, dij dag dat ie oet Jeruzalem votgingen en vergeet dat toch asjeblieft.
21 Ik wait mor al te goud dat ik mis west heb. Doarom bin ik vandoag as eerste van haile stam Jozef bie joe kommen om joe welkom te haiten."
22 Abisai, Seruja zien zeun, braandde lös: "Wat nou? Doodstraf het e verdaind, dij Simi! Hai het Gods gezaalfde ja vervlökt!"
23 Mor David zee: "Woar bemui ie joe mit, ie zeuns van Seruja? Ik loat mie vandoag nait meer deur joe de wet veurschrieven. Vandoag valen der in Israël gain doden. Ik bin nou weer keunenk van Israël. Dou doar denk om!"
24 Tegen Simi zee e: "Doe wordst nait doodmoakt, doar stoa ik börg veur."
25 Mefiboset, Saul zien klaainzeun, was ook kommen om keunenk welkom te haiten. Hai haar zien vouten nait wosken en zien board en klaaier nait verzörgd van dag òf aan dat keunenk votgoan was oet Jeruzalem, tot op dit ogenblik tou dat hai der vaaileg en wel weer was.
26 Mefiboset was van Jeruzalem kommen, en dou hai keunenk in de muit kwam vruig dij hom: "Woarom bistoe nait mitgoan, Mefiboset, dou ik oet Jeruzalem votging?"
27 "Mien heer en keunenk," zee e, "ie waiten ja dat ik kreupel bin. Ik zee tegen mien knecht dat e mien ezel zoadeln mos, zodat ik mit keunenk mitgoan kon. Mor hai het mie bedrogen.
28 Hai het joe dikke leugens over mie verteld. Mor ie, mien heer en keunenk, ie binnen as n engel van God. Dou mor wat joe goud dunkt.
29 Want ik en mien voaders hoes, wie haren aans niks as dood te verwachten. Mor in stee doarvan heb ie mie n plak geven aan joen toavel. Wat recht heb ik den nog om mien beklag bie joe te doun?"
30 Keunenk zee: "Der nait laanger over proaten! Ik onnaaier: doe en Siba verdailen t laand van Saul."
31 "Hai kin t ook aalmoal wel kriegen," zee Mefiboset, "mien heer en keunenk is der ja vaaileg en wel weer!"
32 Barzillai oet Gilead was ter ook. Hai was van Rogelim kommen om keunenk bie te stoan bie Jordaan en den ofschaaid van hom te nemen.
33 Hai was al tachteg joar, slim riek, en hai haar in keunenk zien onderhold veurzain in tied dat dij in Machanaïm touhuil.
34 Keunenk zee tegen Barzillai: "Ie mozzen mor mit mie goan noar Jeruzalem, den zel ik nou ais veur joe zörgen."
35 Mor Barzillai zee: "Mien heer en keunenk, ik heb nog mor n luk zetje meer te leven. Woarom zol ik den nog mit joe noar Jeruzalem goan?
36 Ik bin ja al tachteg joar. k Heb ter gain wait van hou of t doar aan t hòf tougaait. Eten en drinken, doar heb ik gain smoak meer aan. En al zingen joen zangers ook nog zo mooi, dat dut mie niks meer. Ie zollen allain mor last van mie hebben.
37 Ik wol allenneg mor n èndje mit joe over Jordaan goan, woarom zol ie mie doarveur belonen, mien heer en keunenk?
38 Loat mie nou mor weer noar hoes tou goan, dat ik in mien aigen stad staarven kin, bie t stee doar mien olden begroaven liggen. Mor hier is mien zeun Kimham, loat dij toch mit joe mitgoan, den kin ie aan hom doun wat joe goud dunkt."
39 "Dat is in odder," zee keunenk. "Kimham gaait mit, en aal wat joe goud dunkt zel ik aan hom doun, om joe."
40 Aal t volk ging Jordaan over, en dou keunenk ook overstoken was sluig hai Barzillai baaide aarms om haals en gaf hom zien zegen. Dou ging Barzillai weerom noar hoes.
41 Keunenk ging wieder noar Gilgal en Kimham ging mit hom mit.
Dou keunenk over Jordaan goan was, begelaaid deur haile stam Juda en haalfschaid van Isrelieten,
42 kwammen der ofgezanten van aal Isrelieten bie hom en vruigen: "Woarom hebben ons bruiers, dij van stam Juda, joe inpaalmd en joe mit aal joen volk over Jordaan brocht?"
43 Dij van Juda antwoordden: "Omreden keunenk is ain van onzent! Woarom bin ie doar zo kwoad om? Hebben wie asmis leefd op kosten van keunenk of aander perfiet van hom had?"
44 Mor Isrelieten zeden tegen lu van Juda: "Wie hebben wel tien moal zoveul recht op t keunenkschop en op David, as ie. Woarom kiek ie den zo op ons deel? Wie hebben toch zeker t eerste bedocht om ons keunenk weerom te hoalen." Mor lu van Juda wazzen beter bekt as Isrelieten.
|
